• Domo Mak

【投票冷知識】動物界有趣嘅投票方式,連螞蟻都識投票?

Updated: Aug 28



喺日常生活裡面,從「去邊間餐廳食飯」到「立法會選舉」,都可以用投票去表達自己嘅諗法。但你有無諗過原來投票並非喺人類獨有嘅權利?近年唔少動物學家指出原來動物都有屬於自己一套嘅投票方式,去表達意見。細至螞蟻,大至歐洲野牛,都識得用投票嘅方式解決日常種種事務!

歐洲野牛 – 用身體朝向的方向做決定

法國生態學家Amandine Ramos嘅研究指出,歐洲野牛群會採取少數服從多數嘅方式做決定。野牛會藉由身體朝向佢地想要移動的方向表達意見,整個過程好像發起投票一樣。當提議被大多數野牛接納後,佢哋就會開始成群移動;如果唔接納,牛群就會繼續四散,直到下一隻野牛發出移動訊息。

石蟻 – 動物界最貼地嘅「睇樓團」

位於英格蘭南部,居住喺石頭縫隙之間嘅石蟻,當蟻群要搬去一個新蟻穴嘅時候,佢哋會派出一隊「睇樓團」外出搜索新居所。當搵到一個適合嘅宜居點後,佢哋會邀請其他螞蟻入去參觀,如果滿意就會入住,唔滿意就回家。當宜居點聚集足夠多嘅螞蟻之後,哩個地方基本上會被蟻群認可為新巢穴。仍然喺舊居嘅螞蟻,就算幾唔情願都好,都會被其他螞蟻好似運物資咁抬去新巢穴一齊居住。

貓鼬 – 用叫聲達成共識

喺貓鼬嘅族群裡面,凝聚力成為咗佢哋一個關鍵嘅生存之道。如果貓鼬喺離佢哋地盤大約30英尺遠嘅地方,佢哋會用一種獨特嘅”叫聲”作為投票,去決定移動去下一個地方。通常貓鼬只有大約三名成員需要做出決定,而兩隻或以下嘅貓鼬叫聲並唔會影響整個族群嘅意向。

非洲野狗 - 打乞嚏決定狩獵時間

美國布朗大學生物學者 Reena Walker於2017 年發表研究報告,指出非洲野狗會用「打乞嚏」嘅形式決定外出狩獵。當越多非洲野狗打乞嚏,就代表有越多野狗贊成狩獵。另外,地位較高嘅野狗可以享有「特權」,如果發起狩獵,只需要喺族群獲得三個乞嚏就可以獲得通過。相反,地位較低嘅非洲野狗需要至少10個乞嚏先可以獲得通過。

除左以上嘅動物行為之外,其他動物例如非洲水牛、通金獼猴等,都有類似嘅行為。以上幾項研究亦都證實一個共通點:「動物會透過行為互相傳遞訊息俾整個群體,從而達成共識」。由此可見,唔少動物與身俱來都識得用各自嘅投票方方式表態解決問題。

你又認為邊種動物嘅投票方式最有趣呢? 有興趣嘅話歡迎click入以下連結投票並分享比身邊嘅人睇啦!

https://www.votap.app/poll-detail.php?id=2753 想知道更多瘋投的文章及資訊? 立刻按此訂閱電郵,接收每周精選文章及城中最熱門的話題!

21 views

©2020 by O O Possibility Limited